کراچی اسٹاک ایکسچینج میں بدھ کی صبح 9:53 بجے تک ہنڈریڈ انڈیکس 1,717.35 پوائنٹس یعنی 1.5 فیصد کی کمی کے ساتھ 113,154.83 پر آ گیا، جو گزشتہ روز کے اختتامی 114,872.18 پوائنٹس کے مقابلے میں نمایاں کمی ہے۔
ٹوپ لائن سیکیورٹیز کے سی ای او محمد سہیل نے کہا کہ یہ کمی ایسی خبروں کے بعد دیکھی گئی جن میں آنے والے دنوں میں ممکنہ حملے کا خدشہ ظاہر کیا گیا ہے۔
اسی طرح اے کے ڈی سیکیورٹیز کے ریسرچ ڈائریکٹر اویس اشرف کا کہنا تھا کہ سرمایہ کاروں کو بھارت کی جانب سے پاکستان کے خلاف ممکنہ فوجی کارروائی پر بڑھتی ہوئی تشویش لاحق ہے۔ یہ خدشات اس وقت مزید بڑھ گئے جب وفاقی وزیر اطلاعات نے حالیہ پریس بریفنگ میں ممکنہ خطرات کا اشارہ دیا۔
چیس سیکیورٹیز کے ریسرچ ڈائریکٹر یوسف ایم فاروق نے بھی کہا کہ وزیر اطلاعات کے بیانات نے مارکیٹ میں غیر یقینی صورتحال کو بڑھا دیا ہے۔ ان کے مطابق وزیر نے 24 سے 36 گھنٹوں میں بھارت کی جانب سے فوجی کارروائی کے امکان کی وارننگ دی ہے۔
ماہرین کا کہنا ہے کہ پاکستان اور بھارت کے تعلقات سے متعلق خبریں اور پیشرفت آنے والے دنوں میں اسٹاک مارکیٹ کے رجحانات پر اثر انداز ہو سکتی ہیں۔
اس سے قبل وزیر اطلاعات عطا اللہ تارڑ نے بتایا تھا کہ خفیہ اداروں کی مستند رپورٹس کے مطابق بھارت آئندہ 24 سے 36 گھنٹوں میں فوجی کارروائی کا منصوبہ بنا رہا ہے۔ یہ انکشاف بھارتی مقبوضہ کشمیر کے علاقے پہلگام میں پیش آنے والے واقعے کے بعد سامنے آیا، جس کا الزام بھارت نے کسی ٹھوس ثبوت کے بغیر پاکستان پر عائد کیا۔
واقعے کے بعد بھارتی حکومت نے اپنی فوج کو مکمل اختیارات دے دیے ہیں تاکہ وہ اپنی مرضی کے مطابق ردعمل دے سکے۔
میڈیا سے گفتگو کرتے ہوئے وزیر اطلاعات عطا اللہ تارڑ نے بھارت کے بے بنیاد الزامات کو سختی سے مسترد کرتے ہوئے کہا کہ پاکستان اس خطرناک رجحان کی مذمت کرتا ہے جس میں بھارت خود کو خطے میں جج، جیوری اور ایگزیکیوشنر سمجھ رہا ہے۔
