image/svg+xml Openclipart Contact
No Result
View All Result

جنوں تہمت کش تسکیں نہ ہو گر شادمانی کی
مرزا غالب

جنوں تہمت کش تسکیں نہ ہو گر شادمانی کی

نمک پاش خراش دل ہے لذت زندگانی کی

کشاکش‌ ہاۓ ہستی سے کرے کیا سعی آزادی

ہوئی زنجیر موج آب کو فرصت روانی کی

پس از مردن بھی دیوانہ زیارت گاہ طفلاں ہے

شرار سنگ نے تربت پہ میری گل فشانی کی

نہ کھینچ اے سعیٔ دست نارسا زلف تمنا کو

پریشاں تر ہے موئے خامہ سے تدبیر مانی کی

کہاں ہم بھی رگ و پے رکھتے ہیں انصاف بہتر ہے

نہ کھینچے طاقت خمیازہ تہمت ناتوانی کی

تکلف برطرف فرہاد اور اتنی سبکدستی

خیال آساں تھا لیکن خواب خسرو نے گرانی کی

اسدؔ کو بوریے میں دھر کے پھونکا موج ہستی نے

فقیری میں بھی باقی ہے شرارت نوجوانی کی

Pakistanify News Subscription

X

© 2024 Pakistanify Media - Navigating The World of Information