image/svg+xml Openclipart Contact
No Result
View All Result

ہے بزم بتاں میں سخن آزردہ لبوں سے
مرزا غالب

ہے بزم بتاں میں سخن آزردہ لبوں سے

تنگ آئے ہیں ہم ایسے خوشامد طلبوں سے

ہے دور قدح وجہ پریشانی صہبا

یک بار لگا دو خم مے میرے لبوں سے

رندان در مے کدہ گستاخ ہیں زاہد

زنہار نہ ہونا طرف ان بے ادبوں سے

بیداد وفا دیکھ کہ جاتی رہی آخر

ہر چند مری جان کو تھا ربط لبوں سے

کیا پوچھے ہے بر خود غلطیہائے عزیزاں

خواری کو بھی اک عار ہے عالی نسبوں سے

گو تم کو رضا جوئی اغیار ہے لیکن

جاتی ہے ملاقات کب ایسے سببوں سے

مت پوچھ اسدؔ وعدۂ کم فرصتیٔ زیست

دو دن بھی جو کاٹے تو قیامت تعبوں سے

Pakistanify News Subscription

X

© 2024 Pakistanify Media - Navigating The World of Information