image/svg+xml Openclipart Contact
No Result
View All Result

حضور شاہ میں اہل سخن کی آزمائش ہے
مرزا غالب

حضور شاہ میں اہل سخن کی آزمائش ہے

چمن میں خوش نوایان چمن کی آزمائش ہے

قد و گیسو میں قیس و کوہ کن کی آزمائش ہے

جہاں ہم ہیں وہاں دار و رسن کی آزمائش ہے

کریں گے کوہ کن کے حوصلے کا امتحان آخر

ابھی اس خستہ کے نیروے تن کی آزمائش ہے

نسیم مصر کو کیا پیر کنعاں کی ہوا خواہی

اسے یوسف کی بوئے پیرہن کی آزمائش ہے

وہ آیا بزم میں دیکھو نہ کہیو پھر کہ غافل تھے

شکیب و صبر اہل انجمن کی آزمائش ہے

رہے دل ہی میں تیر اچھا جگر کے پار ہو بہتر

غرض شست بت ناوک فگن کی آزمائش ہے

نہیں کچھ سبحہ و زنار کے پھندے میں گیرائی

وفاداری میں شیخ و برہمن کی آزمائش ہے

پڑا رہ اے دل وابستہ بیتابی سے کیا حاصل

مگر پھر تاب زلف پرشکن کی آزمائش ہے

رگ و پے میں جب اترے زہر غم تب دیکھیے کیا ہو

ابھی تو تلخیٔ کام و دہن کی آزمائش ہے

وہ آویں گے مرے گھر وعدہ کیسا دیکھنا غالبؔ

نئے فتنوں میں اب چرخ کہن کی آزمائش ہے

Pakistanify News Subscription

X

© 2024 Pakistanify Media - Navigating The World of Information