image/svg+xml Openclipart Contact
No Result
View All Result

گئی وہ بات کہ ہو گفتگو تو کیونکر ہو
مرزا غالب

گئی وہ بات کہ ہو گفتگو تو کیونکر ہو

کہے سے کچھ نہ ہوا پھر کہو تو کیونکر ہو

ہمارے ذہن میں اس فکر کا ہے نام وصال

کہ گر نہ ہو تو کہاں جائیں ہو تو کیونکر ہو

ادب ہے اور یہی کشمکش تو کیا کیجے

حیا ہے اور یہی گو مگو تو کیونکر ہو

تمہیں کہو کہ گزارا صنم پرستوں کا

بتوں کی ہو اگر ایسی ہی خو تو کیونکر ہو

الجھتے ہو تم اگر دیکھتے ہو آئینہ

جو تم سے شہر میں ہوں ایک دو تو کیونکر ہو

جسے نصیب ہو روز سیاہ میرا سا

وہ شخص دن نہ کہے رات کو تو کیونکر ہو

ہمیں پھر ان سے امید اور انہیں ہماری قدر

ہماری بات ہی پوچھیں نہ وہ تو کیونکر ہو

غلط نہ تھا ہمیں خط پر گماں تسلی کا

نہ مانے دیدۂ دیدار جو تو کیونکر ہو

بتاؤ اس مژہ کو دیکھ کر کہ مجھ کو قرار

وہ نیش ہو رگ جاں میں فرو تو کیونکر ہو

مجھے جنوں نہیں غالبؔ ولے بقول حضور

فراق یار میں تسکین ہو تو کیونکر ہو

Pakistanify News Subscription

X

© 2024 Pakistanify Media - Navigating The World of Information