image/svg+xml Openclipart Contact
No Result
View All Result

خدا کو ڈھونڈ رہا تھا کہیں خدا نہ ملا
بہزاد لکھنوی

خدا کو ڈھونڈ رہا تھا کہیں خدا نہ ملا

زہے نصیب کہ بندے کو مدعا نہ ملا

نگاہ شوق میں بے نوریوں کا رنگ بڑھا

نگاہ شوق کو جب کوئی دوسرا نہ ملا

ہم اپنی بے خودیٔ شوق پر نثار رہے

خودی کو ڈھونڈھ لیا جب ہمیں خدا نہ ملا

تمہاری بزم میں لب کھول کر ہوا خاموش

وہ بد نصیب جسے کوئی آسرا نہ ملا

ہر ایک ذرہ میں میں خود تو آ رہا تھا نظر

عجیب بات تمہارا کہیں پتہ نہ ملا

بس اک سکون ہی ہم کو نہ مل سکا تا عمر

وگرنہ تیرے تصدق میں ہم کو کیا نہ ملا

تری نگاہ محبت نواز ہی کی قسم

کہ آج تک تو ہمیں تجھ سا دوسرا نہ ملا

ترا جمال فضاؤں میں منتشر تھا مگر

نگاہ شوق کو پھر بھی ترا پتہ نہ ملا

ہزار ٹھوکریں کھائیں ہزار سو بہزادؔ

جہان حسن میں کوئی بھی با وفا نہ ملا

Pakistanify News Subscription

X

© 2024 Pakistanify Media - Navigating The World of Information