image/svg+xml Openclipart Contact
No Result
View All Result

گفتگو جب محال کی ہوگی
جون ایلیا

گفتگو جب محال کی ہوگی

بات اس کی مثال کی ہوگی

زندگی ہے خیال کی اک بات

جو کسی بے خیال کی ہوگی

تھی جو خوشبو صبا کی چادر میں

وہ تمہاری ہی شال کی ہوگی

نہ سمجھ پائیں گے وہ اہل فراق

جو اذیت وصال کی ہوگی

دل پہ طاری ہے اک کمال خوشی

شاید اپنے زوال کی ہوگی

جو عطا ہو وصال جاناں کی

وہ اداسی کمال کی ہوگی

آج کہنا ہے دل کو حال اپنا

آج تو سب کے حال کی ہوگی

ہو چکا میں سو فکر یاروں کو

اب مری دیکھ بھال کی ہوگی

اب خلش کیا فراق کی اس کے

اک خلش ماہ و سال کی ہوگی

کفر و ایماں کہا گیا جس کو

بات وہ خد و خال کی ہوگی

جونؔ دل کے ختن میں آیا ہے

ہر غزل اک غزال کی ہوگی

کب بھلا آئے گی جواب کو راس

جو بھی حالت سوال کی ہوگی

Pakistanify News Subscription

X

© 2024 Pakistanify Media - Navigating The World of Information