image/svg+xml Openclipart Contact
No Result
View All Result

امیروں تک رسائی ہو چکی بس
میر تقی میر

امیروں تک رسائی ہو چکی بس

مری بخت آزمائی ہو چکی بس

بہار اب کے بھی جو گزری قفس میں

تو پھر اپنی رہائی ہو چکی بس

کہاں تک اس سے قصہ قضیہ ہر شب

بہت باہم لڑائی ہو چکی بس

نہ آیا وہ مرے جاتے جہاں سے

یہیں تک آشنائی ہو چکی بس

لگا ہے حوصلہ بھی کرنے تنگی

غموں کی اب سمائی ہو چکی بس

برابر خاک کے تو کر دکھایا

فلک بس بے ادائی ہو چکی بس

دنی کے پاس کچھ رہتی ہے دولت

ہمارے ہاتھ آئی ہو چکی بس

دکھا اس بت کو پھر بھی یا خدایا

تری قدرت نمائی ہو چکی بس

شرر کی سی ہے چشمک فرصت عمر

جہاں دے ٹک دکھائی ہو چکی بس

گلے میں گیروی کفنی ہے اب میرؔ

تمہاری میرزائی ہو چکی بس

Pakistanify News Subscription

X

© 2024 Pakistanify Media - Navigating The World of Information