image/svg+xml Openclipart Contact
No Result
View All Result

رات سے آنسو مری آنکھوں میں پھر آنے لگا
میر تقی میر

رات سے آنسو مری آنکھوں میں پھر آنے لگا

یک رمق جی تھا بدن میں سو بھی گھبرانے لگا

وہ لڑکپن سے نکل کر تیغ چمکانے لگا

خون کرنے کا خیال اب کچھ اسے آنے لگا

لعل جاں بخش اس کے تھے پوشیدہ جوں آب حیات

اب تو کوئی کوئی ان ہونٹھوں پہ مر جانے لگا

حیف میں اس کے سخن پر ٹک نہ رکھا گوش کو

یوں تو ناصح نے کہا تھا دل نہ دیوانے لگا

حبس دم کے معتقد تم ہو گے شیخ شہر کے

یہ تو البتہ کہ سن کر لعن دم کھانے لگا

گرم ملنا اس گل نازک طبیعت سے نہ ہو

چاندنی میں رات بیٹھا تھا سو مرجھانے لگا

عاشقوں کی پائمالی میں اسے اصرار ہے

یعنی وہ محشر خرام اب پاؤں پھیلانے لگا

چشمک اس مہ کی سی دل کش دید میں آئی نہیں

گو ستارہ صبح کا بھی آنکھ جھپکانے لگا

کیونکر اس آئینہ رو سے میرؔ ملیے بے حجاب

وہ تو اپنے عکس سے بھی دیکھو شرمانے لگا

Pakistanify News Subscription

X

© 2024 Pakistanify Media - Navigating The World of Information