image/svg+xml Openclipart Contact
No Result
View All Result

زباں رکھ غنچہ ساں اپنے دہن میں
میر تقی میر

زباں رکھ غنچہ ساں اپنے دہن میں

بندھی مٹھی چلا جا اس چمن میں

نہ کھول اے یار میرا گور میں منہ

کہ حسرت ہے مری جاگا کفن میں

رکھا کر ہاتھ دل پر آہ کرتے

نہیں رہتا چراغ ایسی پون میں

جلے دل کی مصیبت اپنے سن کر

لگی ہے آگ سارے تن بدن میں

نہ تجھ بن ہوش میں ہم آئے ساقی

مسافر ہی رہے اکثر وطن میں

خرد مندی ہوئی زنجیر ورنہ

گزرتی خوب تھی دیوانہ پن میں

کہاں کے شمع و پروانے گئے مر

بہت آتش بجاں تھے اس چمن میں

کہاں عاجز سخن قادر سخن ہوں

ہمیں ہے شبہ یاروں کے سخن میں

گداز عشق میں بہ بھی گیا میرؔ

یہی دھوکا سا ہے اب پیرہن میں

Pakistanify News Subscription

X

© 2024 Pakistanify Media - Navigating The World of Information