image/svg+xml Openclipart Contact
No Result
View All Result

کل میرؔ نے کیا کیا کی مے کے لیے بیتابی
میر تقی میر

کل میرؔ نے کیا کیا کی مے کے لیے بیتابی

آخر کو گرو رکھا سجادۂ محرابی

جاگا ہے کہیں وہ بھی شب مرتکب مے ہو

یہ بات سجھاتی ہے ان آنکھوں کی بے خوابی

کیا شہر میں گنجائش مجھ بے سر و پا کو ہو

اب بڑھ گئے ہیں میرے اسباب کم اسبابی

دن رات مری چھاتی جلتی ہے محبت میں

کیا اور نہ تھی جاگا یہ آگ جو یاں دابی

سو ملک پھرا لیکن پائی نہ وفا اک جا

جی کھا گئی ہے میرا اس جنس کی نایابی

خوں بستہ نہ کیوں پلکیں ہر لحظہ رہیں میری

جاتے نہیں آنکھوں سے لب یار کے عنابی

جنگل ہی ہرے تنہا رونے سے نہیں میرے

کوہوں کی کمر تک بھی جا پہنچی ہے سیرابی

تھے ماہ وشاں کل جو ان کوٹھوں پہ جلوے میں

ہے خاک سے آج ان کی ہر صحن میں مہتابی

کل میرؔ جو یاں آیا طور اس کا بہت بھایا

وہ خشک لبی تس پر جامہ گلے میں آبی

Pakistanify News Subscription

X

© 2024 Pakistanify Media - Navigating The World of Information