image/svg+xml Openclipart Contact
No Result
View All Result

کب سے نظر لگی تھی دروازۂ حرم سے
میر تقی میر

کب سے نظر لگی تھی دروازۂ حرم سے

پردہ اٹھا تو لڑیاں آنکھیں ہماری ہم سے

صورت گر اجل کا کیا ہاتھ تھا کہے تو

کھینچی وہ تیغ ابرو فولاد کے قلم سے

سوزش گئی نہ دل کی رونے سے روز و شب کے

جلتا ہوں اور دریا بہتے ہیں چشم نم سے

طاعت کا وقت گزرا مستی میں آب رز کی

اب چشم داشت اس کے یاں ہے فقط کرم سے

کڑھیے نہ روئیے تو اوقات کیونکے گزرے

رہتا ہے مشغلہ سا بارے غم و الم سے

مشہور ہے سماجت میری کہ تیغ برسی

پر میں نہ سر اٹھایا ہرگز ترے قدم سے

بات احتیاط سے کر ضائع نہ کر نفس کو

بالیدگی دل ہے مانند شیشہ دم سے

کیا کیا تعب اٹھائے کیا کیا عذاب دیکھے

تب دل ہوا ہے اتنا خوگر ترے ستم سے

ہستی میں ہم نے آ کر آسودگی نہ دیکھی

کھلتیں نہ کاش آنکھیں خواب خوش عدم سے

پامال کر کے ہم کو پچھتاؤ گے بہت تم

کم یاب ہیں جہاں میں سر دینے والے ہم سے

دل دو ہو میرؔ صاحب اس بد معاش کو تم

خاطر تو جمع کر لو ٹک قول سے قسم سے

Pakistanify News Subscription

X

© 2024 Pakistanify Media - Navigating The World of Information