جہاں اب خار زاریں ہو گئی ہیں
میر تقی میر

جہاں اب خار زاریں ہو گئی ہیں

یہیں آگے بہاریں ہو گئی ہیں

جنوں میں خشک ہو رگ ہائے گردن

گریباں کی سی تاریں ہو گئی ہیں

سنا جاتا ہے شہر عشق کے گرد

مزاریں ہی مزاریں ہو گئی ہیں

اسی دریاے خوبی کا ہے یہ شوق

کہ موجیں سب کناریں ہو گئی ہیں

انہیں گلیوں میں جب روتے تھے ہم میرؔ

کئی دریا کی دھاریں ہو گئی ہیں

سیلاب کی شدت کم ہو گئی ہے، اب یہ بحیرہ عرب کی طرف بڑھ رہا ہے۔