خلاصہ
پنجاب ویمن پروٹیکشن اتھارٹی کی چیئرپرسن حنا پرویز بٹ نے اداکارہ حنا الطاف کو لاہور آنے کی دعوت دی ہے۔ یہ دعوت حنا الطاف کے اس بیان کے بعد دی گئی ہے جس میں انہوں نے کراچی کو خواتین کے لیے ایک جیل قرار دیا تھا۔
پنجاب ویمن پروٹیکشن اتھارٹی کی چیئرپرسن حنا پرویز بٹ نے پاکستانی اداکارہ حنا الطاف کو لاہور آنے کی دعوت دی ہے۔ یہ دعوت اداکارہ کے اس بیان کے بعد دی گئی جس میں انہوں نے کراچی کو خواتین کے لیے ایک ’’جیل‘‘ قرار دیتے ہوئے کہا تھا کہ اس شہر میں خواتین کو اپنی زندگی کھل کر گزارنے کی آزادی حاصل نہیں ہے۔
چند روز قبل اداکارہ حنا الطاف نے لندن کی سڑکوں پر چہل قدمی کرتے ہوئے ایک ویڈیو ریکارڈ کی، جس میں انہوں نے کراچی میں خواتین کو پیش آنے والی مشکلات کے بارے میں بات کی۔ ویڈیو میں انہوں نے کہا کہ وہ کراچی واپس جانے سے پہلے لندن میں اپنا آخری ناشتہ خوب انجوائے کرنا چاہتی ہیں، کیونکہ کراچی پہنچنے کے بعد انہیں دوبارہ وہاں کی زندگی میں واپس جانا ہوگا، جسے انہوں نے ایک ’’جیل‘‘ قرار دیا۔
انہوں نے کہا کہ کراچی میں خواتین کے لیے آزادی سے زندگی گزارنا مشکل ہو گیا ہے، کیونکہ ان کے لیے سڑکوں پر پیدل چلنا بھی دشوار ہو چکا ہے۔
اداکارہ کے بیان کے جواب میں حنا پرویز بٹ نے ایک ویڈیو پیغام جاری کیا، جس میں انہوں نے کہا کہ انہوں نے اداکارہ کی وہ ویڈیو دیکھی ہے جس میں کراچی میں خواتین کو پیش آنے والے سیکیورٹی مسائل کو اجاگر کیا گیا تھا۔
حنا پرویز بٹ نے اداکارہ کو لاہور آنے کی دعوت دیتے ہوئے کہا کہ وزیراعلیٰ پنجاب مریم نواز کی قیادت میں خواتین کا تحفظ اور ان کی حفاظت کو یقینی بنانا پنجاب حکومت کی اولین ترجیحات میں شامل ہے۔
انہوں نے کہا کہ حکومت ایسا محفوظ ماحول قائم کرنے کے لیے پُرعزم ہے جہاں ہر عورت بغیر کسی خوف کے اور کسی بھی قسم کی ہراسانی کا سامنا کیے بغیر، مکمل آزادی اور اعتماد کے ساتھ کہیں بھی آ جا سکے۔
انہوں نے دعویٰ کیا کہ لندن کے مقابلے میں لاہور میں خواتین زیادہ محفوظ ہیں۔ حنا پرویز بٹ کے مطابق، لاہور میں کسی بھی خاتون کو تشدد یا ہراسانی کا سامنا نہیں کرنا پڑا۔
