image/svg+xml Openclipart Contact
No Result
View All Result

نہ کسی پہ زخم عیاں کوئی نہ کسی کو فکر رفو کی ہے
فیض احمد فیض

نہ کسی پہ زخم عیاں کوئی نہ کسی کو فکر رفو کی ہے

نہ کرم ہے ہم پہ حبیب کا نہ نگاہ ہم پہ عدو کی ہے

صف زاہداں ہے تو بے یقیں صف مے کشاں ہے تو بے طلب

نہ وہ صبح ورد و وضو کی ہے نہ وہ شام جام و سبو کی ہے

نہ یہ غم نیا نہ ستم نیا کہ تری جفا کا گلا کریں

یہ نظر تھی پہلے بھی مضطرب یہ کسک تو دل میں کبھو کی ہے

کف باغباں پہ بہار گل کا ہے قرض پہلے سے بیشتر

کہ ہر ایک پھول کے پیرہن میں نمود میرے لہو کی ہے

نہیں خوف روز سیہ ہمیں کہ ہے فیضؔ ظرف نگاہ میں

ابھی گوشہ گیر وہ اک کرن جو لگن اس آئینہ رو کی ہے

Pakistanify News Subscription

X

© 2024 Pakistanify Media - Navigating The World of Information