image/svg+xml Openclipart Contact
No Result
View All Result

برشکال گریۂ عاشق ہے دیکھا چاہیے (ردیف .. ن)
مرزا غالب

برشکال گریۂ عاشق ہے دیکھا چاہیے

کھل گئی مانند گل سو جا سے دیوار چمن

الفت گل سے غلط ہے دعوی وارستگی

سرو ہے با وصف آزادی گرفتار چمن

صاف ہے از بسکہ عکس گل سے گلزار چمن

جانشین جوہر آئینہ ہے خار چمن

ہے نزاکت بس کہ فصل گل میں معمار چمن

قالب گل میں ڈھلی ہے خشت دیوار چمن

تیری آرائش کا استقبال کرتی ہے بہار

جوہر آئینہ ہے یاں نقش احضار چمن

بس کہ پائی یار کی رنگیں ادائی سے شکست

ہے کلاہ ناز گل بر طاق دیوار چمن

وقت ہے گر بلبل مسکیں زلیخائی کرے

یوسف گل جلوہ فرما ہے بہ بازار چمن

وحشت افزا گریہ ہا موقوف فصل گل اسدؔ

چشم دریا ریز ہے میزاب سرکار چمن

Pakistanify News Subscription

X

© 2024 Pakistanify Media - Navigating The World of Information