ہے سبزہ زار ہر در و دیوار غم کدہ (ردیف .. ھ)
مرزا غالب

ہے سبزہ زار ہر در و دیوار غم کدہ

جس کی بہار یہ ہو پھر اس کی خزاں نہ پوچھ

ناچار بیکسی کی بھی حسرت اٹھائیے

دشواریٔ رہ و ستم ہم رہاں نہ پوچھ

جز دل سراغ درد بہ دل خفتگاں نہ پوچھ

آئینہ عرض کر خط و خال بیاں نہ پوچھ

ہندوستان سایۂ گل پاۓ تخت تھا

جاہ و جلال عہد وصال بتاں نہ پوچھ

غفلت متاع کفۂ میزان عدل ہوں

یا رب حساب سختیٔ خواب گراں نہ پوچھ

ہر داغ تازہ یک دل داغ انتظار ہے

عرض فضاۓ سینۂ درد امتحاں نہ پوچھ

کہتا تھا کل وہ محرم راز اپنے سے کہ آہ

درد جدائی اسدؔ اللہ خاں نہ پوچھ

پرواز یک تپ غم تسخیر نالہ ہے

گرمیٔ نبض خار و خس آشیاں نہ پوچھ

تو مشق باز کر دل پروانہ ہے بہار

بیتابیٔ تجلیٔ آتش بجاں نہ پوچھ

دنیا کے پہلے AI-جنریٹڈ وزیر کی جانب سے البانیا میں پارلیمنٹ میں پہلا خطاب