image/svg+xml Openclipart Contact
No Result
View All Result

رہا گر کوئی تا قیامت سلامت
مرزا غالب

رہا گر کوئی تا قیامت سلامت

پھر اک روز مرنا ہے حضرت سلامت

جگر کو مرے عشق خوں نابہ مشرب

لکھے ہے خداوند نعمت سلامت

علی الرغم دشمن شہید وفا ہوں

مبارک مبارک سلامت سلامت

نہیں گر سر و برگ ادراک معنی

تماشاۓ نیرنگ صورت سلامت

دو عالم کی ہستی پہ خط فنا کھینچ

دل و دست ارباب ہمت سلامت

نہیں گر بہ کام دل خستہ گردوں

جگر خائی جوش حسرت سلامت

نہ اوروں کی سنتا نہ کہتا ہوں اپنی

سر خستہ دشوار وحشت سلامت

وفور بلا ہے ہجوم وفا ہے

سلامت ملامت ملامت سلامت

نہ فکر سلامت نہ بیم ملامت

ز خود رفتگی‌ ہائے حیرت سلامت

رہے غالبؔ خستہ مغلوب گردوں

یہ کیا بے نیازی ہے حضرت سلامت

Pakistanify News Subscription

X

© 2024 Pakistanify Media - Navigating The World of Information