ابھی اس طرف نہ نگاہ کر میں غزل کی پلکیں سنوار لوں
بشیر بدر

ابھی اس طرف نہ نگاہ کر میں غزل کی پلکیں سنوار لوں

مرا لفظ لفظ ہو آئنہ تجھے آئنے میں اتار لوں

میں تمام دن کا تھکا ہوا تو تمام شب کا جگا ہوا

ذرا ٹھہر جا اسی موڑ پر ترے ساتھ شام گزار لوں

اگر آسماں کی نمائشوں میں مجھے بھی اذن قیام ہو

تو میں موتیوں کی دکان سے تری بالیاں ترے ہار لوں

کہیں اور بانٹ دے شہر میں کہیں اور بخش دے عزتیں

مرے پاس ہے مرا آئنہ میں کبھی نہ گرد و غبار لوں

کئی اجنبی تری راہ میں مرے پاس سے یوں گزر گئے

جنہیں دیکھ کر یہ تڑپ ہوئی ترا نام لے کے پکار لوں

دنیا کے پہلے AI-جنریٹڈ وزیر کی جانب سے البانیا میں پارلیمنٹ میں پہلا خطاب