image/svg+xml Openclipart Contact
No Result
View All Result

کہتے ہیں بہار آئی گل پھول نکلتے ہیں
میر تقی میر

کہتے ہیں بہار آئی گل پھول نکلتے ہیں

ہم کنج قفس میں ہیں دل سینوں میں جلتے ہیں

اب ایک سی بے ہوشی رہتی نہیں ہے ہم کو

کچھ دل بھی سنبھلتے ہیں پر دیر سنبھلتے ہیں

وہ تو نہیں اک چھینٹا رونے کا ہوا گاہے

اب دیدۂ تر اکثر دریا سے ابلتے ہیں

ان پاؤں کو آنکھوں سے ہم ملتے رہے جیسا

افسوس سے ہاتھوں کو اب ویسا ہی ملتے ہیں

کیا کہیے کہ اعضا سب پانی ہوئے ہیں اپنے

ہم آتش ہجراں میں یوں ہی پڑے گلتے ہیں

کرتے ہیں صفت جب ہم لعل لب جاناں کی

تب کوئی ہمیں دیکھے کیا لعل اگلتے ہیں

گل پھول سے بھی اپنے دل تو نہیں لگتے ٹک

جی لوگوں کے بے جاناں کس طور بہلتے ہیں

ہیں نرم صنم گو نہ کہنے کے تئیں ورنہ

پتھر ہیں انھوں کے دل کاہے کو پگھلتے ہیں

اے گرم سفر یاراں جو ہے سو سر رہ ہے

جو رہ سکو رہ جاؤ اب میرؔ بھی چلتے ہیں

Pakistanify News Subscription

X

© 2024 Pakistanify Media - Navigating The World of Information