image/svg+xml Openclipart Contact
No Result
View All Result

ہے حال جائے گریہ جاں پر آرزو کا
میر تقی میر

ہے حال جائے گریہ جاں پر آرزو کا

روئے نہ ہم کبھو ٹک دامن پکڑ کسو کا

جاتی نہیں اٹھائی اپنے پہ یہ خشونت

اب رہ گیا ہے آنا میرا کبھو کبھو کا

اس آستاں سے کس دن پر شور سر نہ پٹکا

اس کی گلی میں جا کر کس رات میں نہ کوکا

شاید کہ مند گئی ہے قمری کی چشم گریاں

کچھ ٹوٹ سا چلا ہے پانی چمن کی جو کا

اپنے تڑپنے کی تو تدبیر پہلے کر لوں

تب فکر میں کروں گا زخموں کے بھی رفو کا

دانتوں کی نظم اس کے ہنسنے میں جن نے دیکھی

پھر موتیوں کی لڑ پر ان نے کبھو نہ تھوکا

یہ عیش گا نہیں ہے یاں رنگ اور کچھ ہے

ہر گل ہے اس چمن میں ساغر بھرا لہو کا

بلبل غزل سرائی آگے ہمارے مت کر

سب ہم سے سیکھتے ہیں انداز گفتگو کا

گلیاں بھری پڑی ہیں اے باد زخمیوں سے

مت کھول پیچ ظالم اس زلف مشک بو کا

وے پہلی التفاتیں ساری فریب نکلیں

دینا نہ تھا دل اس کو میں میرؔ آہ چوکا

Pakistanify News Subscription

X

© 2024 Pakistanify Media - Navigating The World of Information