image/svg+xml Openclipart Contact
No Result
View All Result

کرتے ہی نہیں ترک بتاں طور جفا کا
میر تقی میر

کرتے ہی نہیں ترک بتاں طور جفا کا

شاید ہمیں دکھلاویں گے دیدار خدا کا

ہے ابر کی چادر شفقی جوش سے گل کے

میخانے کے ہاں دیکھیے یہ رنگ ہوا کا

بہتیری گرو جنس کلالوں کے پڑی ہے

کیا ذکر ہے واعظ کے مصلیٰ و ردا کا

مر جائے گا باتوں میں کوئی غم زدہ یوں ہی

ہر لحظہ نہ ہو ممتحن ارباب وفا کا

تدبیر تھی تسکیں کے لیے لوگوں کی ورنہ

معلوم تھا مدت سے ہمیں نفع دوا کا

ہاتھ آئینہ رویوں سے اٹھا بیٹھیں نہ کیوں کر

بالعکس اثر پاتے تھے ہم اپنی دعا کا

آنکھ اس کی نہیں آئینے کے سامنے ہوتی

حیرت زدہ ہوں یار کی میں شرم و حیا کا

برسوں سے تو یوں ہے کہ گھٹا جب امنڈ آئی

تب دیدۂ تر سے بھی ہوا ایک جھڑاکا

آنکھ اس سے نہیں اٹھنے کی صاحب نظروں کی

جس خاک پہ ہوگا اثر اس کی کف پا کا

تلوار کے سائے ہی میں کاٹے ہے تو اے میرؔ

کس دل زدہ کو ہوئے ہے یہ ذوق فنا کا

Pakistanify News Subscription

X

© 2024 Pakistanify Media - Navigating The World of Information