فیس بک دنیا کا سب سے مقبول سوشل میڈیا پلیٹ فارم ہے، اور اب اس میں ایک بڑی تبدیلی ہونے جا رہی ہے۔
میٹا فیس بک میں ایسی تبدیلیاں کر رہا ہے جو لوگوں کے اس پلیٹ فارم کو استعمال کرنے کے طریقے کو مکمل طور پر بدل سکتی ہیں۔
درحقیقت، میٹا فیس بک کو دوبارہ ڈیزائن کر رہا ہے تاکہ اسے ٹک ٹاک اور یوٹیوب شارٹس کا براہِ راست مقابلہ بنایا جا سکے۔
ایک رپورٹ کے مطابق، میٹا فیس بک کے ایک نئے انٹرفیس کی آزمائش کر رہا ہے، جس میں پلیٹ فارم کی روایتی ٹیکسٹ اور تصاویر والی پوسٹس کے بجائے ویڈیوز پر زیادہ توجہ دی جائے گی۔
جب صارفین فیس بک کھولیں گے تو انہیں ایپ میں روایتی نیوز فیڈ کے بجائے پوری اسکرین پر ویڈیوز کی فیڈ نظر آئے گی۔
کمپنی اس فیچر کو پہلے بھارت میں آزما رہی ہے تاکہ یہ معلوم کیا جا سکے کہ صارفین ویڈیوز پر مبنی اس نئے انداز کو کتنا پسند کرتے ہیں۔
رپورٹ کے مطابق، کمپنی فی الحال محدود تعداد میں صارفین کے ساتھ اس فیچر کی آزمائش کر رہی ہے۔ ان صارفین کے پاس روایتی ڈیزائن پر واپس جانے کا آپشن بھی موجود ہے۔
فیس بک کی پرانی فیڈ نیویگیشن میں ایک ثانوی ٹیب کے طور پر اب بھی دستیاب رہے گی۔
دلچسپ بات یہ ہے کہ یہ فیچر سب سے پہلے ٹک ٹاک نے اپنی ایپ میں متعارف کرایا تھا۔
جب صارفین ٹک ٹاک کھولتے ہیں تو انہیں پوری اسکرین پر ویڈیوز نظر آتی ہیں۔ اب ایسا لگتا ہے کہ میٹا بھی فیس بک کو ٹک ٹاک جیسا پلیٹ فارم بنانا چاہتا ہے۔
یہ کہنا ابھی بھی مشکل ہے کہ اسے مکمل طور پر کب متعارف کرایا جائے گا۔
کامیاب آزمائش کے بعد نیا ڈیزائن ممکنہ طور پر دوسرے ممالک میں بھی مرحلہ وار متعارف کرایا جائے گا، لیکن کمپنی نے ابھی تک اس حوالے سے کوئی باضابطہ اعلان نہیں کیا ہے۔
