image/svg+xml Openclipart Contact
No Result
View All Result

پردۂ شب کی اوٹ میں زہرہ جمال کھو گئے
شکیب جلالی

پردۂ شب کی اوٹ میں زہرہ جمال کھو گئے

دل کا کنول بجھا تو شہر تیرہ و تار ہو گئے

ایک ہمیں ہی اے سحر نیند نہ آئی رات بھر

زانوئے شب پہ رکھ کے سر سارے چراغ سو گئے

راہ میں تھے ببول بھی رود شرر بھی دھول بھی

جانا ہمیں ضرور تھا گل کے طواف کو گئے

دیدہ ورو بتائیں کیا تم کو یقیں نہ آئے گا

چہرے تھے جن کے چاند سے سینے میں داغ بو گئے

داغ شکست دوستو دیکھو کسے نصیب ہو

بیٹھے ہوئے ہیں تیز رو سست خرام تو گئے

اہل جنوں کے دل شکیبؔ نرم تھے موم کی طرح

تیشۂ یاس جب چلا تودۂ سنگ ہو گئے

Pakistanify News Subscription

X

© 2024 Pakistanify Media - Navigating The World of Information