دست عصائے معجزہ گر بھی اسی کا ہے
عرفان صدیقی

دست عصائے معجزہ گر بھی اسی کا ہے

گہرے سمندروں میں سفر بھی اسی کا ہے

تیرا یقین سچ ہے مری چشم اعتبار

سب کچھ فصیل شب کے ادھر بھی اسی کا ہے

بس اپنا اپنا فرض ادا کر رہے ہیں لوگ

ورنہ سناں بھی اس کی ہے سر بھی اسی کا ہے

تیغ ستم کو جس نے عطا کی ہیں مہلتیں

فریاد کشتگاں میں اثر بھی اسی کا ہے

منظر میں جتنے رنگ ہیں نیرنگ اسی کے ہیں

حیرانیوں میں ذوق نظر بھی اسی کا ہے

مجرم ہوں اور خرابۂ جاں میں اماں نہیں

اب میں کہاں چھپوں کہ یہ گھر بھی اسی کا ہے

خود کو چراغ راہ گزر جانتا ہوں میں

لیکن چراغ راہ گزر بھی اسی کا ہے

کراچی یونیورسٹی کیمپس بس نے دوسری سال کی طالبہ کو ٹکر مار دی، جس کے نتیجے میں اس کی موت ہو گئی۔